دووەمین کۆنفرانسێ زانستییێ نێڤدەولەتی ل پەیمانگەها تەکنیکی و پیشەییا ڕەند ب رێڤەچوو

ل ژێر دروشمێ "گۆڕانکارییێن زانینێ د چەرخێ ژیریا دەستکرد دا"، پەیمانگەها تەکنیکی و پیشەییا ڕەند ب هەڤکاری دگەل ژمارەکا سازیێن جودا یێن ناڤخۆ و نێڤدەولەتی، دووەمین کۆنفرانسێ زانستییێ نێڤدەولەتی ب رێڤە بر، کو تێدا کۆمەکا مەزن ژ کەسایەتیێن ئەکادیمی، بەرپرس و ڤەکۆلەرێن ناڤخۆیی و نێڤدەولەتی پشکداربوون.

د ڕۆژا ئێکێ دا، کۆنفرانس ب بەرهەڤبوونا "ماهر نادر" سەرۆکێ جڤاتا ئەمیندارێن پەیمانگەها ڕەند، و پ.هـ.د. کاوە عەبدولعەزیز ڕاگرێ پەیمانگەها تەکنیکی و پیشەییا ڕەند، دگەل هژمارەکا بەرپرس، کەسایەتیێن ئەکادیمی، ڤەکۆلەر و پسپۆران ژ چەندین وڵاتێن جودا دەست بە کارێن خۆ کر. د ڤێ ڕۆژێ دا، چەندین تەوەرێن گرنگ و ستراتیژی هاتنە پێشکێشکرن و گۆتوبێژ ل سەر پەرەپێدانا زانست و تەکنۆلۆژیایێ هاتنە کرن.

کارێن ڕۆژا دووێ یا کۆنفرانسی ب ئامادەبوونا زێدەتر ژ 50 ئەکادیمی، ڤەکۆلەر و پسپۆران ژ وەلاتێن جودا جودا ل هۆلێن پەیمانگەها تەکنیکی و پیشەییا ڕەند بڕێڤەچوون. د ڤێ ڕۆژێ دا، بەشداربوویان کۆمەلەکا ڤەکۆلینێن زانستی یێن پێشکەفتی ل سەر ڕۆڵ و کارتێکرنا ژیریا دەستکرد پێشکێشکرن و دانوستاندنێن کۊر ل سەر ئایندەیێ پەروەردە، زانست و تەکنۆلۆجیایێ ئەنجامدان.

وەک پشکەک ژ چالاکیێن دووماهی هاتنا کۆنفرانسی، ئاهەنگ و شەڤەکا هونەری ل پەیمانگەها ڕەند بڕێڤەچوو. د ڤێ شەڤێ دا، هونەرمەند (هۆزان حەیدەر) ب ستران و بەرهەمێن خۆ کەشەکێ خۆش و پڕ ژ شادی بۆ ئاهەنگێ دابین کر، و ب ڤی شێوەی کارێن دووەمین کۆنفرانسێ زانستییێ نێڤدەولەتی یێ پەیمانگەها ڕەند ب سەرکەفتیانە ب دووماهی هاتن.